Bojonegoro Jagongan.

Bengi iki adheme ngudubilah. Ndingarenan atis kok koyo kenek jopo sirep.
Bengi iki, neng warung protelon pojok deso . . .
. . . Kang Marto ngadeg, njupuk menyok goreng terus njungok eneh. Ambek kemulan sarong sing ambune wis gak karu-karuan kuwi, Kang Marto nekuk sikile, di lempit terus dilebokno nang njero sarong apeke. Cangkeme mecucu-mecucu mergo kebeken menyok sing di emplok.
"Gak mangan, Kang?" Mbok Jiyem takon ambek ngulek sambel kacang.
"Gak, lagek bar mangan" sahute Kang Marto ambek sik kebeken menyok nang cangkeme.
"Ndingaren" kandane Mbok Jiyem.
"Bar pestaok, bar mbeleh pitik" sahute Lik Paijan sing kawit dek maeng iwut ngglintiri mbako.
"Wuah, pantesan ae jok dek maeng ngguya-ngguyu ae" omonge Lik Woto karo ngudeg wedange.
"Lha hiyo, mosok mangan iwak pitik ae ndandak ngenteni pitik gering. Nek gak gering gak oleh di beleh" kandane kang Marto.
"Wooo dadi nggonmu yo kenek kek to Kang?" takone Mbok Jiyem.
"He'eh" sahute ambek ngeleg menyoke.
"Iyo lho, saiki usum kek eneh. Tapi ati-ati lho Kang, Kek e gak koyo dhek biyen. Saiki luweh mbebayani. Gak sembarang kek" kandane Lik Paijan sajak serius.
"Mbebayani piye to Lik?" takone Lik Woto ambek nyedit kreteke.
"Lha kuwi mosok gak eroh sing neng tipi-tipi kuwi, jarene nek enek pitik mati ndadak berbahaya, jarene Flu burung ngono popiye?" omonge Lik Paijan. Diantarane wong sak warung pancen Lik Paijan dewe sing rodho nggenah masalah nasional wong dheke Hansip Desa.
"Nular kuwi Lik?" takone Lik Woto was-was.
"Hiyo, malah jarene enek sing mati goro-goro Flu burung kuwi"
Kang Marto nggreweli, atine ndredheg adem panas. "Engko ojo-ojo pitikku kenek Flu burung kuwi, Lik?" kandhane Kang Marto ambek gemeter.
"Lha pitik mu matine ndadak opo ora?" takone Lik Paijan.
"Matine ndadak yo mergo tak beleh kuwi" omonge Kang Marto lugu.
"Maksute, mulai gering kapan?"
"Wis dhek hingi"
"Yo wis ngene ae, sesuk tak terno nang nggone Pak Lurah lapuran, ben karo Pak Lurah di lapurno nang Puskesmas ben di prikso pitik-pitikem kuwi." kandhane Lik Paijan ngedhem-ngedhem.
Ndilalah nang Tipine Mbok Jiyem pas nyiarno sekilas info.
"100 ayam di Bojonegoro ditemukan terjangkit Flu Burung"

Kang Marto semaput.

dikarang dhewe ambek Mamad